د امریکا د سنا مجلس یوه غړي کرستېن جیلیبرند پر دغه جرګه غږ کړی، چې د افغانستان د جګړې د پای ته رسولو لپاره مداخله وکړي.
د جمهور آژانس د خبر له مخې دغه امریکايي سناتور ویلي افغان جګړه خورا اوږده شوه او د دې جګړې په اړه حقیقتونه پټېږي.
دی وايي، د امریکا سنا نور باید د دغه جګړې په ختمولو کې مداخله وکړي او هرڅه ورازوي، تر څو دغه اوږده جګړه پای ته ورسېږي.
سناتورجیلیبرند له سنا غوښتي، چې د جګړې د پای ته رسولو، ارزولو او حقیقتونو روښانه کولو لپاره باید ځانګړې غونډه جوړه کړي.
دی زیاتوي، چې امریکایي لوړپوړي نظامیان هم د جګړې په اصلي ماهیت نه پوهېږي او هر څه په مبهمه توګه مخ ته روان دي چې باید واضح کړل شي.
امریکایي سناتور پر داسې مهال د افغان جګړې اړه د حقیقونو د پټولو په اړه څرګندونې کوي، چې څه موده وړاندې امریکايي ورځپاڼې هم یو لړ اسنادو په خپرولو سره ویلي و، چې لوړ پوړي امریکايي چارواکي د افغان جګړې په اړه له ولس څخه حقیقتونه پټ کړي او په دغه جګړه کې تر ډېره بې ګناه افغانان وژل شوي دي.
د دغه راپور تر خپرېدو وروسته خو ځینو سناتورانو او امریکایي سیاسیون د دې غوښتنه هم وکړ، چې له هغه کسانو چې د افغان جګړې په اړه یې حقیقتونه له خلکو پټ کړي باید پوښتنې ګروېږنې وشي.
جمهورخبري آژانس:کابل
