وروسته له هغې، چې په ایران کې د کرونا ناروغۍ مثبتې نښتې ثبت شوې، افغانستان له دغه هېواد سره په موقت ډول هر راز هوايي او ځمکنی تګ راتګ بند کړی دی.
د جمهور آژانس د خبر له مخې د افغانستان د ملي امنیت شورا پرون یکشنبې د کب ۴ مه په همدې اړه خپره کړې خبرپاڼه کې ویلي، چې دغه کار یې د کرونا ناروغۍ د مخینوي په موخه کړې دی.
دغه غونډه چې د ملي امنیت شورا د سلاکار ډاکتر حمدالله محب په مشرۍ جوړه شوې وه، پرېکړه وشوه، چې له نورو هېوادونو څخه د کرونا ویروسو د راتګ د مخنیوي لپاره دې له ایران او پاکستان څخه د هګیو، چرګانو او د چرګانو د غوښې واردات ودرول شي.
د عامې روغتیا وزیر فیروز الدین فیروز ویلي، چې تراوسه پورې په افغانستان کې په کرونا ویروسو د چا د اخته کېدو هېڅ قضیه ثبت شوې نه ده.
دا په داسې حال کې ده، چې په هرات ولایت کې د یادې ناروغۍ درې مشکوکې پېښې ثبت شوې او د ناروغانو معاینات یې کابل ته د ازموینې لپاره لېږلي دي.
د هرات روغتیایي چارواکي وايي، دغه کسان چې شکمن ناروغان دي د ایران له قم ښار څخه چې ایران کې د کرونا لومړۍ پېښې په همدې ښار کې ثبت شوې وې، هرات ته راغلي دي.
د هرات روغیتايي چارواکي زیاتوي، چې یاد کسان تر جدي نظارت لاندې دي او معاینات یې کابل ته لېږل شوي دي.
د امنیت شورا په غونډه کې پرېکړه شوې، چې د مالیې او کورنیو چارو وزارتونه به د ماسکونو د قاچاق په مخنیوي کې خپل فعالیتونه څو برابره زیات کړي او همداراز د دولت په خزانه کې د احتمالي اړتیا لپاره ځانګړې بودجه ریزرف شي.
په دغه ناسته کې پرېکړه وشوه، چې په مرکز او ولایتونو کې د همږغۍ او فعالیتونو لپاره ځانګړي کمېټې ایجاد او د عامه پوهاوي لپاره ملي کمپاین ژر تر ژره پیل شي.
دغه راز د بهرنیو چارو وزارت ته سپارښتنه وشوه، چې د ایران په اسلامي جمهوریت کې قنسولي خدمات محدود کړي او له هغه هیواده وغواړي څو، د افغانانو د ایستلو (دیپورټ) لړۍ ودروي.
همداراز د سوداګرۍ او کرهنې وزارتونو ته سپارښتنې وشوې چې د راتلونکو ممکنه حالاتو لپاره د مرکزي اسیا له هیوادونو سره د تجارت او ټرانزیټ د زیاتوالي لپاره چمتووالي ونیسي.
جمهورخبري آژانس:کابل
