د بهرنیو چارو سرپرست او نوماند وزیر محمد حنیف اتمر وايي، د سولې لپاره به نړیواله اجماع رامنځ ته کړي.
د جمهور آژانس د خبر له مخې ښاغلي اتمر دغه څرګندونې پرون شنبې د وري ۱۶ مه وروسته له هغې په یوه اعلامیه کې کړې، چې نوموړی د ولسمشر غني د یوه حکم پر اساس د بهرنیو چارو سرپرست او نوماند وزیر وټاکل شو.
ښاغلي اتمر په دغه اعلامیه کې د ولسمشر دا پریکړه منلې او د افغانستان په اړه د پیاوړې اجماع راوستلو هوډ یې ښکاره کړی دی.
نوموړي زیاته کړې، له خپل ټیم سره تر سلا مشورو وروسته یې د ولسمشر حکم ته مثبت ځواب ورکړی او دی به د افغان سولې لپاره د نړیوالو او سیمه ییزو همکاریو د پیاوړتیا لپاره قوي اجماع راوستلو هڅه وکړي.
د یادونې ده، چې اتمر له عبدالهادي ارغندیوال، طاهر ظهیر وروسته دریمه لویه ګمارنه ده چې ولسمشر یې په خپله کابینه کې کوي.
محمد حنیف اتمر په تېرو دوو لسیزو کې د کلیو پراختیا وزیر، د پوهنې وزیر، کورنیو چارو وزیر او په وروستیو کې یې د ملي امنیت سلاکار په توګه کار کړی دی.
جمهورخبري آژانس:کابل
