د ناټو غوڅ ملاتړ ماموریت په افغانستان کې د کورونا د تشخیص لپاره د ځانګړی GeneXpert 16 لابراتوار د پرانستلو خبر ورکړی دی.
د جمهور آژانس د خبر له مخې ناټو ویلي، په دې لابراتوار کې ټول ټال ۳۸ تنه د ټکنیشن برخې پیاوړي کارکوونکي ګمارل شوي، چې د کورونا د چټک تشخیص برخه کې به فعالیتونه ترسره کوي.
د ناټو د لوژستیک برخې مسوولان وايي، دغه نوي لابراتوار ته د کوویډ ۱۹ ناروغۍ د تشخیص یو کیټ، د بایو فایر ۶ دستګاوې او ۴ جین ایکسپرت او (Thermo Fisher) په نوم ماشینونه راوړل شوي دي.
ناټو وايي، د دغه لابراتوار ټول ظرفیتي او مالي امکانات د اتریش، ناروې او امریکا لخوا ورکول کېږي.
ناټو نه دي ویلي چې ایا دا لابراتوار به یوازې د بهرنیو ځواکونو معاینات کوي که د افغان ځواکونو او عامو وګړو معاینات به هم ترسره کوي.
دا په داسې حال کې ده چې په افغانستان کې دا مهال د کورونا نږدې ۱۳ زره پېښې تثبیت شوې دي.
جمهورخبري آژانس:کابل