هندي رسنیو راپور ورکړی، چې د افغانستان او هند ترمنځ مځکنۍ سوداګري له درو میاشتو وروسته بیا پیل شوه.
د جمهور آژانس د خبر له مخې هند د پاکستان پولې ته څېرمه د اتاري بندر د کرونا ویروس د مخنیوي په پار بند کړی و، چې پرون پنشنبې د غبرګولي ۸ مه یې بېرته خوشي کړی دی.
هندي رسنۍ د د امرتسر د ګمرک کمیشنر دیپکا کومار ګوپتا له قوله وايي، له افغانستان څخه یو کانتینر، چې وچه مېوه پکې بار وه، د پنحشنبې په ورځ له پولې ورواوښت.
سرچینه زیاتوي، چې د هند خاورې ته له رسېدو سره سم، د لارۍ موټرچلوونکی په هغه طبي مرکز کې معاینه شو چې د هندي پنجاب ایالت حکومت په سیمه کې د کورونا وایرس لپاره تازه جوړ کړی دی.
د دغه مرکز او ګمرک ټولو کارکوونکو ته لاسپوټوني او ماسکونه ورکړل شوي دي.
د هند د وچې مېوې د ټولنې رييس انیل مهرا وايي چې د اتاري بندر له لارې د هند او افغانستان د سوداګرۍ ارزښت د کال زر کروړ هندي روپیو ته رسېږي.
جمهورخبري آژانس:کابل
