کابل کې د رسنیو پر کارکوونکو برید، ارګ وايي، عاملین یې د بښلو نه دي

11 جوزا 1399 ساعت 9:03

کابل کې د خورشید تلوېزیون د کارکوونکو په لېږدونکي موټر برید په کور د ننه او بهر کې په کلکو ټکو غندلی شوی او دا یې د بیان پر آزادۍ ښکاره تېری بللی دی.


کابل کې د خورشید تلوېزیون د کارکوونکو په لېږدونکي موټر برید په کور د ننه او بهر کې په کلکو ټکو غندلی شوی او دا یې د بیان پر آزادۍ ښکاره تېری بللی دی.

د جمهور آژانس د خبر له مخې پرون شنبې د غبرګولي ۱۰ مه د کابل ښار د څلورمې حوزې اړوند د ګل سرخ څلور لاري سره د خورشید تلوېزیون د کارکوونکو په لېږدونکي موټر چاودنه وشوه.

په دغه چاودنه کې د خورشید تلوېزیون یو خبریال او یو کارکوونکی و وژل شول او شپږ تنه نور خبریالان او کارکوونکي ټپیان شول.

ارګ په یوه خبرپاڼه کې دغه برید په کلکو ټکو غندلی وايي، د دغه برید عاملین د بښلو نه دي.

د ارګ په خبرپاڼه کې ویل شوي، دا په افغانستان کې د بیان پر آزادۍ او رسنیو پر کار په ښاره توګه تېری دی، چې د منلو او بښلو وړ نه دي.

په افغانستان کې د خبریالانو د خوندیتوب ټولنې دا برید په کلکه غندلی دی او له افغان امنیتي ځواکونو یې غوښتي چې د پېښې عاملین پیدا کړي.

دغې ټولنې په خپل ټویټر کې ویلي دي چې په دغه پېښه کې دوه خبریالان وژل شوي دي.

د افغان خبریالانو د ملاتړ ټولنې وایي خبریالان په افغانستان کې د طالبانو، داعش او نورو وسله والو ډلو د ګواښونو او تهدیدونو تر څنګ، کله ناکله د یو شمېر افغان چارواکو او نورو زورواکو له لوري هم له ستونزو سره مخامخ کیږي.

د امریکا سفارت هم دا برید په کلکه غندلی دی. په کابل کې د امریکا سفارت په خپل کې ټویټر کې لیکلي دي چې دا برید د افغانستان په پرمختګ او مطبوعاتو برید دی.

تر دې دمه د دغې پېښې مسولیت چا نه دی اخیستی او طالبانو هم ویلي دي چې دا د هغوی کار نه دی.

د یادونې ده، چې   څو کاله مخکې په کابل کې د موبي ګروپ، چې طلوع او لمر تلویزون یې یوه برخه ده، د کارکوونکو‌ په موټر دطالبانو په ځانمرګي برید کې د دغه ګروپ اوه خبریالان او کارکوونکي ووژل شول.

تر دغې پېښې وروسته په کابل کې په یو بل ځانمرګي برید کې چې د داعش ډلې یې مسولیت واخیست، هم یو شمېر خبریالان ووژل شول او ژوبل شول.

جمهورخبري آژانس:کابل
 
 
 


د مطلب کود: 128282

دمطلب پته: http://jomhornews.com/ps/news/128282/

جمهور
  http://jomhornews.com