د افغانستان او اذربایجان د بهرنیو چارو وزیرانو خبرې کړې دي

د افغانستان د بهرنیو چارو وزارت سرپرست او نوماند حنیف اتمر د اذربایجان د بهرنیو چارو وزیر المار محمد یاروف سره د ویډیويي کنفرانس له لارې خبرې کړې دي.

د جمهور خبري آژانس د خبر له مخې د بهرنیو چارو وزارت وايي، په دغه اړیکه کې  دواړولورو د دوه اړخیزه او افغانستان، اذربایجان او  ترکمنستان تر منځ د درې اړخیزه اړیکو پر پراختیا، د هوکړه لیکونو په پلي کولو، سوداګرۍ پراختیا، ترانزیټ، مخابرانو په ځانګړې توګه نوري  فایبر باندې خبرې کړې دي.

ښاغلي اتمر له اذربایجاني سیال څخه غوښتي، چې د افغانستان د صادراتو په ځانګړي ډول د مېوو، سبزیو او  مرمر ډبرو د صادرولو په برخه کې زمینه برابره کړي او دغه راز له اذربایجان څخه افغانستان ته د نفتي موادو د واردولو په برخه کې همکاري وکړي.

اتمر د درې اړخیزه اړیکو په پراختیا کې ټینګار کړي، چې د لاجورد لارې تړون او دغه راز د درې واړه هېوادونو تر منځ سوداګرو ته د اسانتیاو رامنځ ته کولو زمینه برابره شي.
 
د لارجود لار چې افغانستان د منځنۍ آسیا له لارې د اروپا سره نښلوي، د سیمې د هېوادونو د اقتصادي ودې لپاره ډېره ګټوره او لنډه ده.

په دې لارې د افغانستان صادرونکي توکي د آقینې او تورغندۍ بندرونو له لارې  ترکمنستان، آذربایجان، ګرجستان، ترکیې ته ځي او  له هغه ځایه بیا اروپا ته لېږل کېږي.

جمهورخبري آژانس:کابل