سیمه ییز چارواکي تاییدوي، چې په سمنګان ولایت کې په یوه کان کې له چاودنې وروسته کان پر کارګرو راپرېوتی، چې له امله یې ۱۶ کارګر وژل شوي دي.
د
جمهور خبري آژانس د خبر له مخې پېښه پرون سه شنبې د غبرګولي۲۰ مه له غرمې وروسته د سمنګان دره صوف بالا ولسوالۍ کې رامنځ ته شوې ده.
د دره صوف بالا ولسوال محمد سلطان سلطاني وايي، د یادې ولسوالۍ په شباشک کې په یوه کان کې چاودنه شوې ده.
هغه د مرګ ژوبلې په اړه څه ونه ویل، خو د کانونو وزارت ویاند عبدالقدیر مصطفی وايي، دوی په لاس ورغلي معلومات ښي، چې په کان کې ۱۶ کارګر وژل شوياو۱۸ نور هم بند پاتې دي.
ویل کېږي سیمې ته د ژغورنې ټیم رسېدلی خو تر اوسه یې بند پاتې کسانو برخلیک نه دی معلوم کړي.
د کانونو وزارت مسوولین وايي، خپلو تخنیکي او عملیاتي ټیمونو ته یې لارښوونه کړې، چې ژر لاس په کار شي او د پېښې په اړه ټول معلومات راټول کړي.
د یادونې ده، چې په د سمنګان د ډبرو سکرو په دغه کانونو کې له دې وړاندې هم څو څو ځله ورته پېښې رامنځ ته شوې، چې لامل یې په غیر قانوني او غیر فني توګه د کانونو را ایستل دي.
جمهورخبري آژانس:کابل