سیمه ییز چارواکي تاییدوي، چې د اروزګان ولایت کې د طالبانو په برید کې ۷ تنو پولیس سرتېرو ته مرګ ژوبله اوښتې، خو برید یې په شاه تمبول شوی دی.
د جمهور آژانس د خبر له مخې طالبانو تېره شپه د اروزګان د مرکز ترینکوټ ښار پر امنیتي کمر بند د دې لپاره ډلیز برید کړي، چې ښار ته لار خلاصه کړي، خو د چارواکو په وینا نه دی بریالي شوي.
د وسله والو طالبانو او افغان ځواکونو تر منځ نښتې تر سهار پورې دوام کړي، چې د چارواکو په خبره سهار مهال طالبانو ماته وخوړه او په شاه وتمبول شول.
د یادې جګړې د تلفاتو په اړه د اروزګان د والي ویاند زړګی عبادي وايي، د طالبانو په برید کې د شهرا د کنډک رئیس ارکان سمونمل ابراهیم جان وژل شوی او ۷ پوليس نور ټپیان شوي.
د عبادې په وینا په جګړه کې دوه طالبان هم وژل شوي او پنځه نور ټپیان شوي دي او پر شاه تمبول شوي دي.
د یادونې ده، چې له تېرو ۲ اونیو راهیسې پر ترینکوټ ښار د وسله والو طالبانو د بریدونو اوازې زیاتي شوي او د سیمي لس ګونو کورنیو هم د جګړو له وېري له خپلو سیمو څخه کډوال شوي.
طالبانو تر اوسه په دې اړه څه نه دي ویلي.
جمهورخبري آژانس:اروزګان
