د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد ټینګار کړي، چې د بین الافغاني خبرو پیلېدو لپاره پاتې مسائل باید ژر تر ژره حل شي.
د جمهور آژانس د خبر له مخې خلیلزاد نن جمعه د چنګاښ ۱۳ مه ویلي چې روانه اونۍ یې له ولسمشر غني او د ملي مصالحې عالي شورا له مشر عبدالله عبدالله سره یې د ویډيويي کنفرانس له لارې د پاتې موضوعاتو پر ژر هوارېدو او سولې خبرو پيلېدو په اړه ټینګار کړی دی.
نوموړي پر خپل ټوېټر لیکلي چې په دې اړه ځنډ د سولې بهیر د ګډوډونکو لپاره فرصت رامنځته کوي.
د افغان سولې لپاره د امریکا د بهرنیو چارو وزارت ځانګړي استازي زلمي خلیزاد همدارنګه ویلي چې له افغان مشرانو سره یې د افغانستان د اقتصادي ودې په اړه هم خبرې کړي دی.
زلمي خلیلزاد ویلي چې د سولې اقتصادي ګټې د جګړې تر اقتصادي ګټو ډېرې دي.
هغه ویلي چې تلپاتې سوله په لږ لګښت او لږ خطر سره د د ډېرې پانکونې په معنا کېدای شي.
نوموړي زیاته کړې«موږ یو ګډ نظر لرو چې د سولې اقتصادي ګټې د جګړې له ګټې څخه ډېرې دي،تلپاتې سوله په کم خطر او لږ لګښت سره د ډېرې پانګونې لامل کېدای شي»
د افغانستان جمهوري ریاست تر دامهاله روانه اونۍ له زلمي خلیلزاد سره د ولسمشر غني د ویډیويي کنفرانس په اړه معلومات نه دي ورکړي.
ښاغلي خلیلزاد د تیرې سې شنبې په ورځ په ازبکستان کې د منځنۍ اسیا د پنځو هیوادونو ازبکستان، تاجکستان، قزاقستان، قرغزستان او ترکمنستان د بهرنیو چارو له وزیرانو سره د افغان سولې بهیر ترڅنګ پر اقتصادي مسائلو هم خبرې کړي وې.
زلمي خلیلزاد یو باثبات او پر خپلو پښو ولاړ افغانستان د منځنۍ اسیا هیوادونو لپاره مهم بللی و.
د یادونې وړ ده چې ښاغلي خلیلزاد د تېرې پنجشنبې په ورځ اسلام اباد ته د سفر پر مهال د پاکستان د بهرنیو چارو له وزیر شاه محمود قریشي سره هم د افغان سولې بهیر په اړه خبرې کړي وې.
جمهورخبري آژانس:کابل
