سیمه ییز چارواکي تاییدوي، چې میدان وردګ ولایت کې د افغان ځواکونو یوې پوستې ته نېږدې موټر بم برید شوی خو په وینا یې مرګ ژوبله نه لري.
د جمهور آژانس د خبر له مخې برید نن پنشنبې د چنګاښ ۱۹ مه د میدان وردګ ولایت د سیدآباد ولسوالۍ د شېخ آباد په سمیه کې شوي دی.
د میدان وردګو د والي ویاند محب الله شریفزی وايي، موټر بم برید هدف ته تر رسېدو مخکې چاودنه کړې، چې په کې افغان ځواکونو ته هېڅ ډول زیان نه دی اوښتی.
د والي ویاند زیاتوي، چې د سیمې خلکو ته مالي زیانونه رسېدلي او په برید کې چا ته مرګ ژوبله نه ده اوښتې.
په سیمه کې عیني شاهدان هم د برید د پخلي تر څنګ وايي، په برید کې چا ته زیان نه دی اوښتی خو خلکو ته یې مالي زیانونه اړولي دي.
تر اوسه د دغه برید مسوولیت چا نه دی اخیستی.
دا په داسې حال کې ده، چې وړمه ورځ د کندهار په شاولي کوټ ولسوالي کې د پولیسو په یوه مرکز په موټر بم برید کې ۴ پولیس وژل شوي او ۱۷ نور ټپیان شوي وو.
جمهورخبري آژانس:کابل
