د ناټو سرمنشي ینس سټولټنبرګ وايي، د طالبانو له خوا د تاوتریخوالي زیاتېدا د منلو نه ده، ځکه دغه تاوتریخوالی د سولې په پروسه کې اعتماد زیانمنوي.
د جمهور آژانس د خبر له مخې ستولتنبرګ وړمه ورځ د افغانستان په سمنګان ولایت کې د ملي امنیت پر ریاست او ښاروالۍ د طالبانو برید غندلی دي.
نوموړي نن چهارشنبې د چنګاښ ۲۴ مه په یوه ټویټ کې لیکلي، چې د طالبانو د حملو له کبله په افغانستان کې د تاوتریخوالي د زیاتېدو کچه د سولې په پروسه کې اعتماد ته زیان اړوي.
نوموړي ویلي«موږ په ټولو خواوو ږغ کوو چې ژر تر ژره بین الافغاني خبرې پیل کړي، د ناټو غړي او متحدان به د سولې د بهیر د ملاتړ لپاره زموږ د پوځي حضور په اړه سلامشورې ته دوام ورکړي.»
ناټو په عین حال کې یوه اعلامیه هم خپره کړې چې د طالبانو له لوري د تاوتریخوالي پر زیاتېدو یې په کې اندېښنه ښودل شوې ده.
د یادونې ده، چې د دوشنبې په ورځ د سمنګان ولایت د ملي امنیت پر ریاست موټر بم او ډلیز وسله وال برید وشو، چې مسوولیت یې طالبانو ومانه.
د ځايي چارواکو په وینا په دغه برید کې ۱۱ تنه وژل شوي او ۶۳ نور ټپیان شوي، چې ۱۰ تنه په کې د ملي امنیت کارکونکي او نور ټول ملکي وګړي دي.
دغه برید د افغان حکومت، امریکا، اروپايي ټولنې او ناټو له خوا په کلکه وغندل شو.
د افغان سولې لپاره د امریکا ځانګړي استازي ویلي، د طالبانو له لوري د تاوتریخوالي زیاتوالی د دغه ډلې د کړو ژمنو خلاف عمل دي.
نوموړي ویلي، وروسته له دې به د طالبانو سره د امریکا هوکړه، د کړو ژمنو په عملي کېدو سره عملي کېږي.
جمهورخبري آژانس:کابل
