کندوز او پکتیکا ولایتونو کې د افغان ځواکونو او طالبانو تر منځ نښتو کې دواړو لورو ته درنه مرګ ژوبله اوښتې ده.
د جمهور آژانس د خبر له مخې ملي دفاع وزارت هم په یادو ولایتونو کې د جګړو او په کې د مرګ ژوبلې پخلی کړی دی.
دفاع وزارت نن دوشنبې د چنګاښ ۳۰ مه جلا خبرپاڼه کې ویلي، طالبانو تېره شپه د قندوز ښار د شینوارو او قزاق په کلیو کې د افغان ځواکونو پر امنیتي پوستو بریدونه وکړل.
د وزارت په خبرپانه کې ویل شوي، چې د افغان ځواکونو په ځوابیه برید کې ۷ طالبان وژل شوي او ۵ نور ټپیان شوي دي.
که څه هم وزارت د افغان ځواکونو د مرګ ژوبلې یادونه نه ده کړې، خو د کندوز د والي ویاند عصمت الله مرادي وايي، د طالبانو په برید کې ۵ پولیس وژل شوي او درې نور ټپیان شوي دي.
دغه راز مرادي زیاته کړې، د کندوز د علي آباد پر لاسه هم پر امنیتي پوستو بریدونه کړي، چې درې پوځیان یې وژلي او دوه نور یې ټپیان کړي دي.
مرادي وایي، په مرکز کې جګړې ۳ او په علي آباد ولسوالۍ کې جګړې ۲ ساعته دوام کړی، خو د افغان ځواکونو د مقاومت په نتیجه کې طالبانو ماته خوړې او پر شاه تمبول شوي دي.
په ورته وخت کې دفاع وزارت وايي، افغان ځواکونو په پکتیکا ولایت کې هم د طالبانو بریدونه مات او دوی یې پر شاه تمبولي دي.
دفاع وزارت په خبرپانه کې ویلي، طالبانو د پکتیکا ولایت په ارګون او وازه خوا ولسوالیو کې بریدونه کړي و، چې له کلک ځواب سره مخ شول.
د وزارت په وینا د ارګون په شېخان په سیمه کې ۴ طالبان وژل شوي او یو بل ټپي شوی دی.
دغه راز وزارت زیاتوي، چې د وازې خوا ولسوالۍ په مرجاني سیمه کې د جګړې پر مهال ۴ طالبان وژل شوي او ۶ نور ټپیان شوي دي.
دفاع وزارت په دغه جګړو کې د خپل لوري د مرګ ژوبلې په اړه څه نه دي ویلي او طالبانو هم تر اوسه غبرګون نه دی ښودلی.
جمهورخبري آژانس:کابل
