په اسلام آباد کې افغان سفیر عاطف مشعل له خپلې دندې استعفا کړې او د نوموړي استعفا د ولسمشر غني له خوا منل شوې ده.
د جمهور آژانس د خبر له مخې مشعل ویلي، د نورو لوړو زده کړو او ځینو معاذیرو له مخې د کار دوام ورته ستونزمن شوی او نشي کولی چې خپلې دندې ته ادامه ورکړي.
نوموړي په خپله ټوېټرپاڼه لیکلي، لومړۍ استعفاء یې تېر کال د لیندۍ په ۲۵ ولسمشر محمد اشرف غني ته سپارلې وه او دوهمه استعفاء یې د روان کال د زمري پر ۵ مه نېټه ولسمشر ته وړاندې کړې ده.
ښاغلی مشعل وايي«د اوسني ماموریت پای مې وطن ته د خدمت کولو خاتمه نه ده، بلکې په راتلونکي کې به د زمینې مساعدېدلو په صورت کې بیا هم د خپل هیواد لپاره کار کوم.»
عاطف مشعل دغه راز زېاته کړې چې د ولسمشر د لارښوونو مطابق یې خپله دنده په پوره ژمنتیا سره تر سره کړې ده.
ولسمشر غني د عاطف مشعل استعفاء منلې ده.
مشعل تر دې وړاندې د څو کلونو لپاره د کرکټ بورډ رئیس په توګه دنده تر سره کړې او وروسته په اسلام آباد کې د افغانستان سفیر وټاکل شو.
جمهورخبري آژانس:کابل