د خوست ولایتي دیني عالمانو د یوې غونډې پر مهال د سولې پروسه کې له اسلامي هېوادونه د مرستې غوښتنه وکړه.
د جمهور آژانس د خبر له مخې دغو علماوو اسلامي هېوادونه مکلف وبلل چې د افغان حکومت او طالبانو تر منځ د شته اختلافاتو په وجه مداخله وکړي، تر څو په افغانستان کې تل پاتې سولې ته لار هواره شي.
دغه راز د خوست دیني عالمانو په عامه خلکو هم غږ وکړ چې په دواړو لوریو دې د سولې غږ کولو بهیر جاري وساتي او خلک دې په خپلو کې متحد شي.
دوی وروستیو نا امنیو او د بې ګناه ملکیانو وژل کېدو ته په اشارې سره وویل چې روان حالت د منلو وړ نه دی او باید نور د تاوتریخوالي څخه لاس واخیستل شي.
د دیني عالمانو په وینا جګړه د افغانانو نه ده، بلکې پردۍ جګړه ده او افغانان پکې وژل کېږي چې ګټه یې بهرنیانو ته رسېږي.
هغوی وایي، افغانان باید د خپل فقر او بېچارګۍ په خاطر پر یو بل رحم وکړي او له روان وضعیت څخه د وتلو لپاره سره یو ځای شي.
د یادونې وړ ده چې تر دې وړاندې هم د هېواد په بېلا بېلو ولایتونو کې دیني عالمانو، ځوانانو او مېرمنو له دواړو لوریو د تلپاتې سولې او اوربند قایمولو غوښتنې کړي دي.
جمهورخبري آژانس:کابل
