اروزګان کې هوايي برید ۱۷ طالبانو ته مرګ ژوبله اړولې

ملي دفاع وزارت وايي، افغان هوايي ځواک اروزګان ولایت کې پر طالبانو هوايي برید کړی او ۱۷ تنه وسله والو ته یې مرګ ژوبله اړولې ده.

د جمهور خبري آژانس د خبر له مخې دفاع وزارت نن سه شنبې د لړم ۱۳ مه خپره کړې اعلامیه کې ویلي، افغان هوایي ځواک د اروزګان په دهراود ولسوالۍ کې د طالبانو پر یوه غونډه برید وکړ.

دفاع وزارت وايي، په دغه برید کې ۱۲ وسله وال طالبان وژل شوي او ۵ نور ټپیان شوي دی.

د وزارت په خبرپاڼه کې راغلي، دا برید پر داسې مهال وشو، چې طالبانو غوښتل د افغان ځواکونو پر پوستو بریدونه وکړي.

دفاع وزارت وايي، په دغه هوايي برید کې د طالبانو دوه میله کلاشنکوف او یو میل پیکا هم له منځه وړل شوې ده.

طالبانو تر اوسه په دې اړه څه نه دي ویلي.

د یادونې ده، چې په اروزګان کې هم له تېرو څو اونیو راهیسې جګړې روز اخیستی، چې له امله یې سلګونه کورنۍ بې ځایه شوې هم دي.

جمهورخبري آژانس:کابل