ولسمشر غني د امریکا د پوځ د مرکزي قوماندانۍ له قوماندان جنرال مک کېنزي سره په ارګ کې لیدلي او پر ځینو موضوعاتو یې خبرې ورسره کړې دي.
د جمهور آژانس د خبر له مخې د ښاغلي غني او مک کېنزي لیدنه پرون دوشنبې د مرغومي اوله ارګ کې شوې ده.
ارګ وايي، دغه لیدنه کې لومړی مرستیال امرالله صالح، د پوځ مشر جنرال ضیا، د چارو ادارې مشر فضلي، افغانستان کې د بهرنیو ځواکونو عمومي قوماندان جنرال سکاټ مېلر او کابل کې د امریکا سفارت شارژادفیر هم حضور درلود.
د ارګ خبرپاڼه زیاتوي، چې په دغه لیدنه کې دواړو لورو د سولې پروسې او دغه راز له افغان ځواکونو د امریکا د ملاتړ په اړه خبرې اترې وکړې.
جنرال مک کېنزي په خپلو خبرو کې یو ځل بیا له افغان امنیتي او دفاعي ځواکونو د امریکا متحده ایالاتو د دوامداره ملاتړ ډاډ څرګند کړی دی.
خبرپاڼه زیاتوي، چې په دغه بحث کې دواړو لورو په افغانستان کې پر روان تاوتریخوالي اندېښنه وښوده او د سولې پروسې د ښه پرمختګ لپاره یې د پام وړ تاوتریخوالي پر کمولو او اوربند ټينګار وکړ.
د یادونې ده، چې ولسمشر غني څو ورځې وړاندې د امریکا د پوځ له مشر جنرال مارک میلي سره هم په ارګ کې کتلي و او د سولې پروسې تر څنګ یې، د روان تاوتریخوالي د کمښت، اوربند او افغان ځواکونو د ملاتړ په اړه خبرې کړې وې.
جمهورخبري آژانس:کابل