ولسمشر محمد اشرف غني اړوند ارګانونو ته لارښوونه کړې چې د وروستیو تروریستي بریدونو عاملین پیدا او په سزا یې ورسوي.
د جمهور آژانس د خبر له مخې ارګ نن شنبې د مرغومي ۶ مه اعلامیه کې ویلي، ولسمشر غني امنیتي او دفاعي ارګانونو ته د سیاسي، مدني او ټولنیزو فعالانونو د امنیت ټینګولو په اړه لازمې لارښوونې کړي دي.
په خبرپاڼه کې ویل شوي،«د هېواد جمهور رئیس اړوندو ارګانونو ته دستور ورکړ چې پر مدني فعالې فرشتې کوهستانۍ د برید په ګډون دې د ټولو وروستیو تروریستي بریدونو عاملین پیدا او د خپلو ناوړه اعمالو په سزا ورسوي.»
دا په داسې حال کې ده چې تر بل هر وخت د کابل په ګډون یو شمېر نورو ولایتونو کې هدفي بریدونه او چاودنې زیاتې شوي دي.
د تاوتریخوالي او هدفي بریدونو په تازه پېښو کې نن شنبه په کابل کې د درې پرله پسې چاودنو له امله څلور تنه ووژل شول او څلور تنه نور ټپیان شول.
د تیرې اونۍ په وروستۍ پېښې کې مدني فعاله فرشته کوهستاني په کاپیسا کې د نا څرګنده وسله والو له خوا ووژل شوه.
همدارنګه د ازادو او عادلانه ټاکنو بنسټ مشر یوسف رشید هم په ورته پېښې کې کابل کې ووژل شو.
تر دې وړاندې غزني کې د خبریالانو د ټولنې مشر رحمت الله نېکزاد، ننګرهار کې خبریاله ملاله میوند، هلمند کې د ازادۍ راډیو خبریال محمد الیاس داعي او پخوانی خبریال یما سیاوش هم د ورته پېښې له امله کابل کې ووژل شو.
په افغانستان کې د هدفي بریدونو زیاتېدو په اړه د بېلابېلو بنسټونو او عامو خلکو لخوا اندېښنې زیاتې شوي دي.
جمهورخبري آژانس:کابل