افغان ولسمشر محمد اشرف غني په هې،اد کې د برېښنايي حکومتولۍ پر پیاوړتیا ټینګار کړی او په همدې موخه یې د امارتي شرکت له مسوولینو سره لیدلي دي.
د جمهور آژانس د خبر له مخې د ارګ خبرپاڼه وایي، ښاغلي غني پرون ماښام د مرغومي ۲۰ مه د متحده عربي اماراتو د G42 شرکت مسوولینو سره وکتل.
خبرپاڼه وايي، دغه لیدنه کې د افغانستان حکومت د دیجیټلي کولو لپاره د پالیسیو او شېوو پر پياوړتیا، د دغه بهیر د عملي کېدو لپاره د معلوماتي او مخابراتي ټکنالوژۍ زېربناوو د ارزونې او بستر جوړولو په اړه بحث او خبرې وشوې.
سرچینه زیاتوي، ښاغلي غني د برېښنایي حکومتولۍ پر پیاوړتیا ټینګار وکړ وې ویل: زموږ لیدلوری دا دی چې د ۲۱ پېړۍ د اړتیاو مطابق د دیجیټلي کولو پر ستراتېژۍ کار وکړو.
ښاغلي غني په اقتصادي، تعلیمي، روغتیا او نورو برخو کې د دیجیټلي سیستم پر استفادې ټینګار وکړ وې ویل، موږ باید هڅه وکړو چې په اوسني وخت کې د ټکنالوژۍ له پرمختګونو وروسته پاتې نه شو.
ولسمشر زیاته کړې، موږ یوې لار نقشې ته اړتیا لرو چې وتوانېږو په راتلونکو څلورو کلونو کې د سیستمونو د دیجیټلي کولو له لارې دولت او مارکیټ جوړول او د سولې اعمار چټک کړو.
جمهورخبري آژانس:کابل
