راپورونه وايي، ننګرهار کې د استېناف محکمې یو کارکوونکی د نامعلومه وسله والو کسانو په غلچکي برید کې وژل شوی دی.

د جمهور آژانس د خبر له مخې دغه پېښه نن چهارشنبې د مرغومي ۲۴ مه د جلال آباد ښار څلورمې ناحیې اړوند مالوچو کوڅې ته څېرمه رامنځ ته شوې ده.

د ننګرهار د استېناف محکمې یوې سرچینې ویلي، د دغه محکمې دوه کارکوونکي عبدالقیوم او عصمت الله دندې ته په لاره و، چې په یاده سیمه کې وسله والو کسانو پرې برید کړی دی.

سرچینې زیاته کړې، چې په دغه برید کې عبدالقیوم نومی وژل شوی او بل ملګری یې ټپي شوی دی.

د ننګرهار سیمه ییز روغتون چارواکو هم تایید کړې، چې دوی ته د یوه تن جسد وروړل شوی دی.

تر اوسه د برید مسوولیت چا نه دی اخیستی.

جمهورخبري آژانس:ننګرهار