امریکايي سي اېن اېن تلوېزیون په یوه راپور کې ویلي، امریکا او طالبان دواړه دوحه کې کړې هوکړې ته ژمن نه دي، ځکه افغانستان کې د دغه هوکړې سره سم هر څه مخ ته نه دي روان.
د
جمهور خبري آژانس د خبر له مخې دغه رسنۍ وايي، د امریکا د نه ژمنتیا نښه دا ده، چې ښايي امریکا په افغانستان کې د خپلو سرتېرو حضور ته ادامه ورکړي.
دغه رسنۍ زیاته کړې همدا اوس په افغانستان کې هر څه د دوحې د هوکړې پر بنسټ مخ ته نه دي روان، خو د بایډن اداره غواړي دغه موارد له خپلو خلکو پټ کړي.
سرچینې د سیګار وروستي راپورته په نغوتې ویلي، که امریکايي سرتېري بې وخته ورځي او د سولې ډاډمنه هوکړه نه رامنځ ته کېږي، نو په افغانستان کې خونړۍ جګړې رامنځ ته شي او نړیوال امنیت ته ستر خطرونه جوړ کړي.
په ورته وخت د سي اېن اېن راپور کې راغلي، طالبان همدا اوس هم د وخت په ضایع کولو بوخت دي.
راپور وايي، طالبان دې ته په تمه دي چې د دوحې هوکړې نېټه پوره شي او که تر هغه وروسته امریکایي عسکر له افغانستان و نه وځي نو دغه ډله جګړو ته ادامه ورکوي.
د سي اېن اېن په راپور کې ټینګار شوی، چې افغان جګړه باید د خبرو له لارې پای ته ورسول شي او په دې برخه کې ديپلوماتیکې هڅې مهمې دي.
جمهورخبري آژانس:کابل