دې هېل نشریې په یوه مطلب کې لیکلي، د امریکا ولسمشر جوبایډن ته به له افغانستان څخه د پاتې امریکايي ځواکونو د ایستلو پرېکړه ډېره سخته وي.
د
جمهور خبري آژانس د خبر له مخې مطلب کې راغلي ولسمشر بایډن په دې برخه کې له کشمکشونو سره مخ او په دې لټه کې دی، چې په افغانستان کې د خپلو سرتېرو حضور یو څه نور هم اوږد کړي.
ځکه له یوې خوا د وتلو نېټه نږدې کېدونکې ده، له بلې خوا په افغانستان کې وضعیت د ډاډ وړ نه دی، بلخوا د ناټو متحدین د سرتېرو له ایستلو سره مخالف دي او په امریکا کې هم نظاميانو د بېړنیو وتلو په اړه بایډن ته خبرداری ورکړی دی.
په مطب کې ویل شوي، که څه هم د طالبانو او امریکا د هوکړې له مخې تر مې میاشتې پورې باید ۲۵۰۰ امریکایي عسکر له افغانستان ووځي خو داسې ښکاري چې بایډن د دې نېټې د ځنډولو په لټه کې دی.
د مطلب لیکوال ویلي، ښایي بایډن تر راتلونکي کال پورې له افغانستان د سرتېرو ایستل وځنډوي.
سرچینه وايي، له همدې امله د افغانستان په اړه بايډن ته پرېکړه کول سخت شوي دي خو تمه شته چې ژر تر ژره بین الافغاني مذاکرات پایله ولري او د بهرنیو سرتېرو وتلو ته زمینه برابره شي.
دا په داسې حال کې ده، چې طالبانو له وړاندې خبرداری ورکړي، چې که بهرني سرتېري د مۍ تر اولې له افغانستان څخه ونه وتل، دوی به بېرته پرې بریدونه پیل کړي.
جمهورخبري آژانس:کابل