سیمه ییز چارواکي تاییدوي، چې افغان ځواکونه د بادغیس ولایت له جوند ولسوالۍ هم تکتیکي شاتګ کړی دی.
د جمهور آژانس د خبر له مخې د بادغیس والي حسام الدین شمس وايي، ولسوالۍ د طالبانو د ګواښونو زیاتوالي او د مرګ ژوبلې د مخنیوي په خاطر پرېښودل شوې ده.
دی وايي، له دغې ولسوالۍ د خلکو له وتلو روسته افغان ځواکونو ته هم د تکتیکي شاتګ امر شوی دی.
د والي په وینا جوند ته په غځېدلو لارو کې د ماینونو د ګواښ له امله دغه ولسوالي له شاوخوا درېیو کلونو راهیسي په اقتصادي محاصره کې وه.
خو د بادغیس د والي په وینا افغان کومانډو ځواکونه د دغې ولسوالۍ د بېرته نیولو عملیاتو لپاره چمتوالی نیسي.
طالبانو ویلي، جوند ولسوالۍ یې په بشپړه توګه نیولې ده او افغان ځواکونو ته یې د درنې مرګ ژوبلې اړولو ادعا کړې.
دغې ډلې ویلي چې په جوند کې یې زیاته اندازه وسلې، مهمات او وسایط هم نیولي دي.
جمهورخبري آژانس:کابل
