د بشري حقونو د څار ډله: طالبانو کندهار کې بشر ضد جنایتونه کړي

د بشري حقونو د څار ډلې یا هیومن رایټس واچ پر طالبانو تور پورې کړی، چې کندهار کې یې د ولسوالیو له نیولو وروسته سلګونه کسان په دې نوم نیولي، چې ګڼې له حکومت سره یې مرسته کړې ده.

د جمهور خبري آژانس د خبر له مخې دغه ډلې پرون جمعه د زمري اوله خپره کړې خبرپاڼه کې ویلي، طالبانو له نیولو شویو کسانو څخه اکثریت یې وژلي هم دي.

دا په داسې حال کې ده، چې د افغانستان د کورنیو چارو وزارت هم ادعا کړې، چې طالبانو یوازې د کندهار په سپین بولدک ولسوالۍ کې کابو ۴ سوه تنه له کورونو ایستلي، چې ۱۰۰ یې ترې وژلي او د نورو برخلیک لا هم نه دی معلوم.

د کندهار ځايي چارواکي هم د دې خبر پخلی کوي او وايي طالبانو د خاشه ځوان په نوم یو ټوکي هم وژلی دی.

د سپین بولدک ځینې اوسېدونکي وايي، دا وژنې پاکستانیان کوي، چې د ځینو وژنو په اړه ځايي طالبانو هم حیرانتیا ښوولې ده.

د بشري حقونو د څار ډله وايي چې طالبانو په سپین بولدک کې ۳۰۰ تنه نیولي چې د مرګ او ژوند په اړه یې معلومات نه شته.

د دې ادارې د اسیا ريیسې پتریشیا ګاسمن ویلي، ژوره اندېښنه شته چې طالبان ممکن په کندهار کې د حکومتي مامورینو او امنیتي ځواکونو پر ضد نورې بې رحمۍ وکړي.

خو طالب ویاند ذبیح الله مجاهد دا راپورونه په کلکه رد کړي وايي، دا د دوی پر ضد تبلیغات دي، چې هېڅ حقیقت نه لري.

نوموړي ویلي، چې په سپین بولدک ولسوالۍ کې هېڅوک هم نه دي وژل شوي.

جمهورخبري آژانس:کابل