سیمه ییز امنیتي چارواکي وايي، بلخ ولایت کې د یوې ماین چاودنې له امله پنځه تنه ټپیان شوي دي.
د جمهور آژانس د خبر له مخې چاودنه پرون جمعه د زمري ۸ مه د بلخ مرکز مزارشریف ښار د کارته زراغت سیمې د تېلو په ټانګ کې شوې ده.
د بلخ امنیتی چارواکي وايي، چاودنه دغه ولایت کې د تښتول شوي ماشوم عبدالروف د پلار محمد نبي پر ساتونکو شوې ده.
د بلخ د پولیسو ویاند عادل شاه عادل وايي، په دغه چاودنه کې د محمد نبي څلور ساتونکي او یو ټکسي چلوونکی ټپیان شوي دي.
تراوسه د دې چاودنې علت معلوم نه دی، خو په غالب ګومان، ښايي د اختطاف شوي عبدالرووف له پلار حاجي نبي سره د شخصي دښمنۍ پر اساس د برمته نیوونکو یا د هغه د مخالفانو کار وي.
خپله محمد نبي هم د خپل زوی برمته نیوونکي په دې برید تورنوي.
د یادونې ده، چې د محمدنبي پر موټر تېره اوونۍ هم د ماین یوه چاودنه وشوه چې په نتیجه کې یې درې کسان مړه او شپږ نور ټپیان شول.
عبدالرووف له شااوخوا لسو میاشتو راهیسې د انسان تښتوونکو له خوا برمته شوی او د هغه د ژغورنې لپاره هڅو نتیجه نه ده ورکړې.
جمهورخبري آژانس:بلخ