د کورنیو چارو وزارت تاییدوي، چې کابل ښار کې د تېرې شپې په موتر بم او ډلیز وسله وال برید کې ۸ تنه وژل شوي او کابو ۲۰ نور ټپیان دي.
د جمهور آژانس د خبر له مخې د کورنیو چارو وزارت ویاند میرویس ستانکزي ویلي، افغان ځواکونو تر پنځه ساعته عملیاتو وروسته بریدګر له منځه وړي دي.
که څه هم نوموړي په دې اړه چې بریدګر څو تنه و څه نه دي ویلي، خو راپورونه وایي، څلور بریدګر و، چې څلور واړه وژل شوي دي.
ویل کېږي په وژل شویو کسانو کې یوه مېرمن، یو د ملي امنیت کارکوونکی، یو د محمد ساتونکی او دوه د یوه بل وکیل ساتونکي هم شامل دي.
د یادونې ده، چې پرون ماښام د کابل ښار د لسمې امنیتي حوزې اړوند شېرپور سیمه کې د ملي دفاع د سرپرست وزیر بسم الله محمدي په مېلمستون وسله والو برید وشو.
ویل کېږي لومړی یو موټر بم برید شوی او له هغې وروسته څو تنه وسله وال د محمدي د کور تر څنګ د یوه وکیل کور ته ننوتي او له هغې ځایه یې جګړه کړې ده.
په دغه برید او جګړه کې د سیمې د اوسېدونکو د کورنو ښيښې هم ماتې شوې او خلکو ته ګڼ مالي زیانونه اوښتي دي.
تر اوسه پورې د دغه برید مسوولیت چا نه دی اخیستی.
په کابل ښار کې دغه چاودنه پر داسې مهال کیږي چې تیره شپه ګڼ شمېر کابل ښاریانو د الله اکبر نارو په وهلو سره په هیواد کې د جګړې بندېدو غوښتنه کول.
جمهورخبري آژانس:کابل
