د بښنې نړیوال سازمان وایي، د امریکایي ځواکونو له لوري په افغانستان کې د ملکي وګړو وژل یو بوږنوونکی او د نه بښلو وړ عمل و.
د جمهور آژانس د خبر له مخې د دغه ادارې چارواکو ویلي، امریکا منلې چې تر وتلو څو ساعته مخکې یې په ډرون برید کې ملکي وګړي وژلي، چې دا خبره یوازې په منلو نه حل کېږي.
سرچینې زیاته کړې، اوس چې امریکا د ملکي وګړو وژل کېدل منلي، باید په دې اړه څېړنې ډېرې شي، اصلي مسوولین یې باید د قانون منګولو ته وسپاري او د ټولو پلټنو معلومات دې د قربانیانو له کورنۍ سره شریک کړل شي.
د بښنې نړیوال سازمان همدا راز ویلي، امریکا مجبوره ده چې د قربانیانو کورنۍ ته تاوان ورکړي.
امریکا له کابل هوایي ډګر د خپلو ځواکونو تر وتلو مخکې د اګست په ۲۹ مه پر یوه کور د ډرون برید وکړ چې د لسو په شاوخوا کې ملکي وګړي او د یوې کورنۍ غړي یې و وژل.
په لومړي سر کې امریکا ویل چې په برید کې یې هغه موټر په نښه کړی، چې داعش په کې د برید پلان درلود خو پرون یې دفاع وزارت ومنله، چې برید پر ملکي وګړو شوی او ۱۰ تنه په کې وژل شوي دي.
جمهورخبري آژانس:کابل
