د امریکا د بهرنیو چارو وزارت مرستیال وندي شرمن وايي، د طالبانو د حکومت په رسمیت پېژندل تر اوسه لرې خبره ده.
د جمهور آژانس د خبر له مخې شرمن دغه څرګندونې پرون جمعه د تلې ۱۶ مه اسلام آباد کې د یوې خبري ناستې پر مهال کړې او ویلي یې دي، امریکا به په سمدستي توګه د طالبانو د حکومت د رسمیت پېژندلو لپاره کوم ګام وانخلي.
نوموړې زیاته کړې، چې امریکا اوس مهال په افغانستان کې د بشري ناورین د حل لپاره پر بېړنیو او ممکنه اقداماتو تمرکز کوي.
د امریکا د بهرنیو چارو وزارت مرستیالې ټینګار وکړ، چې د طالبانو د حکومت د په رسمیت پېژندلو لپاره د امریکا د شرطونو پوره کول اړین دي.
د بشري حقونو درناوي ته عملي ژمنتيا، د ښځو په ګډون ټول شموله حکومت جوړول او داسې نور د طالبانو د حکومت پېژندلو لپاره د امریکا اساسي شرطونه دي.
طالبان وايي، دوی د په رسمیت پېژندلو لپاره ټول شرطونه پوره کړي دي، امریکا او نوره نړۍ دې د خپلو موخه لپاره پر افغانستان نور فشارونه نه راوړي او په کورنیو چارو کې یې د لاسوهنه نه کوي.
جمهورخبري آژانس:کابل
