د اسلامي امارت د امر بالمعروف او نهی عن المنکر وزارت د افغانستان د تلوېزیونو د نشراتو لپاره ځینې قیودات اعلان کړل.
د جمهور آژانس د خبر له مخې دغه محدویتونه پرون یکشنبې د لړم ۳۰ مه د تلوېزیونونو د مسوولینو سره د یاد وزارت په یوه ناسته کې اعلان شوي دي.
دغه قیودات په اتو مادو کې نشر شوي، چې له مخې یې تلوېزیونونه د هغو ډرامو او ټلویزوني تمثیلونو د خپرولو اجازه نه لري، چې ښځینه وو رول پکې لوبولی وي.
په یوه بله ماده کې د ټلویزون د ښځینه کارکوونکو په اسلامي حجاب ټینګار شوی او دغه راز د هغو بهرنیو فلمونو او سریالونو د خپریدو منع اعلان شوې، چې د طالبانو په نظر د اسلامي شریعت مخالف وي.
په اعلامیه کې د هغو سریالونو د نه خپریدو امر شوی، چې دین او انساني کرامت پکې توهین شوی وي.
د هغو سریالونو او پروګرامونو په نه خپریدو هم ټینګار شوی دی، چې د انبیاوو او صحابه وو رول پکې لوبول شوی وي.
طالبانو هغه طنزي او تفریحي پروګرامونه هم منع ګرځولي، چې د اشخاصو د توهین او تحقیق سبب ګرځیږي.
له رسنیزو مشرانو سره په دې اړه جوړه شوې غونډه کې د امر بالمعروف وزیر او د طالبانو ویاند ذبیح الله مجاهد دواړو رسنیو ته د دوی د ملاتړ ډاډ ورکړی.
طالب چارواکو رسنۍ له ممبر سره تشبیه کړي او ویلي، چې له دې وسیلې څخه باید خلک خیر ته دعوت کړل شي.
ذبیح الله مجاهد وايي، دوی د رسنیو ملاتړ په هغه صورت کې کوي، چې د ټولنې اصلاح ته کار وکړي او د هېواد لوړې ګټې او اسلامي ارزښتونه په پام کې ونیسي.
همدا شان ټینګار شوی دی، چې رسنۍ باید د بهرني فرهنګ د ترویج د مخنیوي لپاره کار وکړي.
جمهورخبري آژانس:کابل
