چین وایي، امریکا دې نور د افغانستان د خلکو پر زخمونو مالګې نه پاشي، بلکې ژر تر ژره دې د دغه هېواد کنګل کړې مالي پانګه آزاده کړي.
د جمهور آژانس د خبر له مخې د چین د بهرنیو چارو وزارت په سخت ژمي کې د افغانستان د خلکو په اړه اندېښنه وښوده او ویې ویل، چې امریکا دې یو اړخیزه بندیزونه لرې کړي.
کابل کې د چین سفیر وانګ یو نن سه شنبې د زمري ۲۱ مه د خپل هېواد د بهرنیو چارو وزارت ویاند له قوله پر خپله ټوېټر پاڼه لیکلي، د امریکا یو اړخیزه بندیزونو د افغانستان خلک له ګڼو ستونزو سره مخ کړي دي.
هغه ویلي«سخت ژمني، واورې او باران د افغانستان د خلکو، چې خواړه او ګرم لباس هم نه لري ژوند نور هم سخت کړی دی، خو له دې سره سره د امریکا ظالمانه او یو اړخیزه اقتصادي بندیزونو د افغانستان لپاره لوی خنډونه جوړ کړي دي.»
د چین د بهرنیو چارو وزارت ویاند د دې په ویلو سره چې د چین خلک د افغانستان د خلکو پر بد وضعیت دردمند دی وايي، که څه هم امریکا له افغانستانه پښې سپکې کړې خو لا هم د اشغال تاثیرات په شدت سره باقي پاتې دي.
ونبین د افغانستان د اوسنی بحراني حالت اصلي مقصر امریکا وبلله او ټینګار یې وکړ، چې امریکا نه باید په یو اړخه بندیزونو سره د افغانستان اقتصادي وضعیت او د خلکو ژوند لا تریخ کړي.
ده زیاته کړې«موږ له امریکا غواړو، چې له خپلو تېروتنو عبرت واخلي، د خپل نړیوال مسوولیت په درک کولو سره د افغانستان مالي زېرمې آزادې کړي او خپل یو اړخیزه بندیزونه ژر تر ژره پای ته ورسوي.»
په ورته وخت کې د چین د بهرنیو چارو وزارت د نړۍ پر نورو هېوادونو هم غږ کړی او ترې غوښتي یې دي، چې د سیاسي مسایلو په نه پام کې نیولو سره د افغانستان له خلکو سره مرستې وکړي.
چین د افغانستان د مالي پانګې د آزادولو غوښتنه پر داسې مهال کوي، چې د امریکا د سولې انستېتیوت په یوه راپور کې د ولسمشر جوبایډن له ادارې غوښتي، چې د افغانستان کنګل کړې پسې او مالي پانګه آزاده کړي.
سرچینې ویلي، له افغانستان سره مالي مرستې، د امریکا او نورې نړۍ روابط او دغه راز د دغه هېواد له نوي دولت سره د پاکستان اړیکې به د افغانستان راتلونکې روښانه کړي.
په راپور کې ويل شوي، د پاکستان او افغانستان مثبتې اړیکې کولی شي د دواړو هېوادونو او دغه راز د سیمې له ثبات سر مرسته وکړي.
سرچینې زیاته کړې، یوازې بشردوستانه مرستې نه شي کولی افغانستان له اقتصادي بحرانه وباسي.
د امریکا د سولې انسټیټوټ وړاندیز کړی دی چې امریکا باید د افغانستان کنګل شوې نهه میلیارده ډالر مالي پانګه ازاده او بېرته د افغانستان بانکونو ته ولېږدوي.
جمهورخبري آژانس:کابل