د پاکستاني طالبانو تحریک یا ټي ټي پي په افغانستان کې د خپلو دریو جګپوړو غړو د وژل کېدو پخلی کړی خو وايي، دې کار کې د پاکستان استخبارات یا آی اېس آی لاس لري.
د جمهور آژانس خبر له مخې پاکستاني طالبانو او د پاکستان استخباراتي چاروکو تایید کړې، چې د ټي ټي پي یو جګپوړی مشر عبدالولي، چې په عمر خالد خراساني مشهور و وژل شوی دی.
سرچینې ویلي، عمر خالد خراساني له خپلو دریو همکارانو سره چې هغه هم لوړ پوړي غړي و، ډېورنډ کرښې ته څېرمه د پکتیا ولایت برمل ولسوالۍ کې په یوه ماین چاودنه کې وژل شوي دي.
د پاکستاني طالبانو یوه بل قوماندان احسان الله احسان په یوه ټوېټ کې د خراساني مړینه تایید کړې او ویلي یې دي چې نور هغه د دوی په منځ کې نه شته.
خراساني چې له ټي ټي پي جلا یې د جماعت الحرار په نوم ډله جوړه کړې وه، ملګروملتونو او متحدو ایالاتونو هغه یوه ترویستي ډله نومولې او د ده پر سر واشنګټن درې میلیون ډالره انعام ټاکلی و.
د پاکستاني طالبانو تحریک یا ټي ټي پي هم د یوې خبرپاڼې په خپرولو سره د عمرخراساني او د هغه د ملګرو وژل کېدو پخلی کړی او وايي، په دې کار کې د پاکستان استخبارات لاس لري.
د ټي ټي پي له لوري په خپره شوې اعلامیه کې راغلي چې پاکستاني استخبارات د دوی د مشرانو په وژلو کې لاس لري او تر څنګ یې د غچ اخیستلو خبر هم ورکړی دی.
جمهورخبري آژانس:کابل