روسیه د افغانستان په اړه غونډه جوړوي

15 دلو 1401 ساعت 9:04

ټاکل شوې ده چې مسکو روانه اونۍ د افغانستان په اړه د یوې غونډې کوربه وي.


ټاکل شوې ده چې مسکو روانه اونۍ د افغانستان په اړه د یوې غونډې کوربه وي.

د افغانستان لپاره د روسیې ځانګړي استازي ضمیر کابلوف د جمعې په ورځ د روسیې تاس اژانس ته ویلي، د منځنۍ اسیا د څو هېوادونو د امنیت شورا استازي، همداراز د هند، چین او پاکستان چارواکي به په دې غونډه کې برخه واخلي.

د کابلوف په وینا د دغو هېوادونو استازیو ته بلنلیکونه استول شوې دي، خو ده په دې اړه نور جزییات ورنه کړل چې د طالبانو استازي به هم په کې برخه اخلي که نه.

د روسي رسنیو په وینا، امنیت، اقتصاد او د افغانستان بشري وضعیت هغه عمده ټکي دي چې روانه اونۍ به د مسکو په غونډه کې خبرې پرې وشي.

داسې ویل کېږي چې د دې غونډې یوه اساسي موضوع به له هر راز ترهګریز ګواښ څخه د منځنۍ اسیا د خوندیتوب لپاره د سیمې په کچه د همکاریو زیاتول وي.

طالبانو هم تر اوسه پورې څه نه دي ویلي، چې دې غونډه کې به ګډون کوي او که نه.

خو د سیمې د یو شمېر هېوادونو په څلور اړخیزه مخکنۍ غونډه کې چې پروسږکال د مې په ۲۷مه د تاجکستان په پلازمېنه دوشنبې کې د افغانستان لپاره جوړه شوې وه په هغې کې د طالبانو استازیو ته بلنه نه وه ورکړل شوې.

جمهورخبري آژانس
 


د مطلب کود: 157587

دمطلب پته: https://www.jomhornews.com/ps/news/157587/

جمهور
  https://www.jomhornews.com