طالبانو په اسلام آباد کې د پاکستان او چین سره په درې اړخیزه غونډه کې له ګډون څخه انکار کړی او د غونډې کوربه توب یې کابل ته اړولی دی.
د جمهور اژانس د راپور له مخې، په کابل کې باخبره سرچینې وايي چې د طالبانو پلاوي د افغانستان، پاکستان او چین ترمنځ د درې اړخیزو خبرو اترو په نوي پړاو کې د ګډون لپاره پاکستان ته له سفر کولو ډډه کړې ده.
دا غونډه، چې ټاکل شوې وه په اسلام آباد کې په نوبتي ډول ترسره شي، د طالبانو د پاکستان ته د سفر د مخالفت له امله به بیا په کابل کې ترسره شي.
د پخوانیو موافقو پر بنسټ، وروسته له هغه چې پخوانۍ غونډه په کابل کې وشوه، د دې خبرو اترو کوربه توب د اسلام آباد وار و. خو، د طالبانو له خوا پاکستان ته د سفر کولو انکار د دې هیواد حکومت اړ کړ چې د کوربه توب واک کابل ته وسپاري.
باخبره سرچینو اعلان وکړ چې د پاکستان او چین ځانګړي استازي پرون کابل ته رسیدلي او ټاکل شوې ده چې نن (شنبه، د غوایي ۲۰مه، په کابل کې درې اړخیزه غونډه جوړه شي.
تر اوسه پورې، د طالبانو یا پاکستاني حکومتي چارواکو د دې انکار د لاملونو په اړه په رسمي ډول تبصره نه ده کړې. خو سیاسي کارپوهان دا اقدام د دواړو ګاونډیو هېوادونو ترمنځ د دوامداره ډیپلوماټیکو کړکېچونو نښه ګڼي.
د کابل او اسلام آباد ترمنځ اړیکې په وروستیو میاشتو کې د سرحدي ستونزو، د وسله والو ډلو د ملاتړ په اړه د متقابل تورونو او امنیتي مسلو له امله له ننګونو سره مخ شوي دي.
د دې درې اړخیزې غونډې موخه د سیمه ییزې همکارۍ پیاوړتیا ده، په ځانګړې توګه په اقتصادي او امنیتي برخو کې، د افغانستان، پاکستان او چین ترمنځ.
جمهورخبري آژانس
