د افغانستان لپاره د روسیې د ولسمشر ځانګړي استازي ضمیر کابلوف د دوحې په غونډه کې له متحده ایالاتو وغوښتل چې د افغانستان نیول شوې لس ملیارده ډالر شتمنۍ خوشې کړي.

جمهور اژانس د تاس په حواله لیکي، ضمیر کابلوف د دوحې په غونډه کې متحده ایالاتو ته په خطاب کې وویل: "واشنګټن باید د افغانستان د کنګل شویو شتمنیو څخه ۱۰ ملیارد ډالر خوشې کړي."

هغه زیاته کړه: "د افغانستان ستونزې به د غونډو، کنفرانسونو او تکراري تحلیلونو په جوړولو سره حل نشي." "افغانان ریښتینې مرستې ته اړتیا لري، نه ژمنو یا د موجوده ستونزو تحلیل ته."

د روسیې د ولسمشر ځانګړي استازي همدارنګه د ترهګرو ډلو له لیست څخه د طالبانو د نوم لرې کولو ته اشاره وکړه او ویې ویل: "دا له کابل سره د لا زیاتې همکارۍ په لور یو لوی ګام دی." کابلوف یادونه وکړه چې روسیې په مختلفو سکتورونو کې له طالبانو سره خپله امنیتي همغږي زیاته کړې ده.

د یادونې وړ ده چې د دوحې غونډه، چې د طالبانو او د پاکستان، روسیې او چین په ګډون د ځینو هیوادونو استازو پکې ګډون کړی و، د جولای په ۲۹مه، د قطر په پلازمېنه کې پیل شوه.

په افغانستان کې د ملګرو ملتونو مرستندویه پلاوي (یوناما) په یوه اعلامیه کې اعلان وکړ چې دا غونډه به دوه ورځنۍ وي او په کې به د مخدره توکو سره د مبارزې او په افغانستان کې د خصوصي سکتور د ملاتړ لپاره اخیستل شوي اقدامات بیاکتنه وشي.

دا غونډه په داسې وخت کې ترسره کېږي چې د افغانستان کنګل شوې شتمنۍ د هیواد د اقتصاد لپاره یوه له اصلي ننګونو څخه ده، او نړیواله ټولنه تر فشار لاندې ده چې د افغانانو د ژوند د ښه کولو لپاره عملي حل لارې ومومي.

جمهورخبري آژانس