د خوړو نړیوال پروګرام اعلان کړی چې په افغانستان کې نږدې ۱۰ میلیونه خلک سږ کال دوبي کې له لوږې سره مخ دي.

د جمهور اژانس د راپور له مخې، د خوړو نړیوال پروګرام چارواکو نن دوشنبې (د چنګاښ ۱۶ مه) د سازمان په X پاڼه کې لیکلي چې په روان دوبي کې نږدې ۱۰ میلیونه افغانان له لوږې سره مخ دي، خو د بودیجې د سخت کمښت له امله، د خوړو نړیوال پروګرام (WFP) یوازې د یو ملیون سره د مرستې توان لري.

دغه سازمان مخکې ویلي وو چې په افغانستان کې له هرو دریو کورنیو څخه دوه یې نشي کولی د خپلو ورځنیو اړتیاوو لپاره کافي خواړه واخلي.

د خوړو نړیوال پروګرام ټینګار کړی و چې په افغانستان کې د بشري او خوراکي مرستو اړتیاوې لاهم سختې پاتې دي او کورنۍ نشي کولی د خوړو اساسي لګښتونه پوره کړي.

جمهورخبري آژانس