د طالبانو د اقتصاد وزارت مشر د غیر دولتي موسسو او راستنیدونکو ترمنځ د لا زیاتې همکارۍ غوښتنه کړې ده.

د جمهور آژانس د خبر له مخې طالبانو د اقتصاد وزارت نن دوشنبې  (د چنګاښ ۲۳ مه) په یوه اعلامیه کې وویل چې د وزارت مشر دین محمد حنیف د کمیټې له غړو سره غونډه وکړه او د کورنیو او بهرنیو غیر دولتي موسسو له چارواکو سره یې د راستنیدونکو ستونزو د حل او د هغوی لپاره د اړینو اسانتیاوو د رامنځته کولو په اړه خبرې وکړې.

د طالبانو د اقتصاد سرپرست وزیر د راستنیدونکو سره د دې همکارۍ او مرستې د دوام غوښتنه وکړه.

د اقتصاد سرپرست وزیر په ټولو غیر دولتي موسسو غږ وکړ چې د راستنیدونکو د فوري ستونزو د حل سربیره په استوګنیزو سیمو کې د سرپناه جوړولو، د اوبو رسولو سیسټمونو جوړولو، د څښاک د اوبو څاګانو کیندلو او د ښوونځیو، مدرسو، جوماتونو او روغتیایی کلینیکونو په څیر عامه تاسیساتو په جوړولو کې فعاله ونډه واخلي.

په اعلامیه کې ویل شوي چې د غیر دولتي موسسو چارواکو د هغو پروګرامونو او پروژو په اړه هم معلومات ورکړل چې دوی یې د کډوالو او راستنیدونکو ستونزو د حل لپاره پلي کوي، او د اقتصاد وزارت د بیا میشتیدنې کمیټې او د مرستو د جلب او جذب کمیټې سره د همکارۍ لپاره بشپړ چمتووالی څرګند کړ.

جمهورخبري آژانس