د طالبانو د شهیدانو او معلولینو وزارت ویاند ادعا کوي چې دې ډلې په تیرو دریو میاشتو کې له شپږو میلیاردو څخه ډیرې افغانۍ معلولینو، یتیمانو او بې سرپرسته میرمنو ته ویشلي دي.

د جمهور آژانس د خبر له مخې د طالبانو د شهیدانو او معلولینو وزارت ویاند فیصل خاموش نن شنبې (د وږي ۸مه) وویل چې په تیرو دریو میاشتو کې یې شپږ میلیارده او ۹۴۳ میلیونه افغانۍ یتیمانو، معلولینو او بې سرپرسته میرمنو ته ویشلي دي.

هغه زیاته کړه چې معلولینو، یتیمانو او بې سرپرسته میرمنو ته د نغدي مرستو د ویشلو پروسه دوام لري او دا نغدي مرسته په وار وار د اړمنو بانکي حسابونو ته سپارل کیږي.

د راپورونو له مخې، طالبان د مرستو ډیره برخه د خپلو هغو جنګیالیو ژوندیو پاتې شویو کسانو ته ویشي چې د پخواني حکومت پر وړاندې په جګړه کې وژل شوي وو.

جمهورخبري آژانس