په نیمروز ولایت کې سیمه ییزو طالبانو د ولایت ۷۰۰ اړمنو کورنیو ته د غنمو ویش اعلان کړ.
د جمهور آژانس د خبر له مخې د نیمروز ولایت د طالبانو د والي د رسنیو دفتر نن شنبې (د وږي ۲۲ مه) په یوه بیان کې وویل چې د طبیعي پیښو سره د مبارزې ولایتي ادارې په ولایت کې ۷۰۰ اړمنو کورنیو ته د غنمو مرسته ویشلې، چې هرې کورنۍ ته ۱۰۰ کیلوګرامه غنم ورکړل شوي دي.
په بیان کې زیاته شوې چې دا مرسته د بشري همکارۍ په موخه چمتو شوې ترڅو د اړمنو کورنیو اړتیاوې په جزوي ډول پوره شي.
د نیمروز سیمه ییزه اداره تل هڅه کوي چې اړمنو کورنیو ته مرستې چمتو کړي او له مرستندویه سازمانونو څخه یې غوښتي چې د اړمنو خلکو ملاتړ وکړي.
دا مرسته په داسې حال کې ورکړل شوه چې مرستندویه سازمانونو پخوا په نیمروز کې اړمنو کورنیو ته خوراکي او غیر خوراکي توکي ویشلي دي.
جمهورخبري آژآنس
