اوچا یا په افغانستان کې د ملګرو ملتونو د مرستو د همغږۍ دفتر وايي، د سپټمبر تر نیمايي پورې له پاکستانه ۳۲۷۴۰۰ افغان کډوال ایستل شوي دي.
دغه سازمان د سه شنبې په ورځ د عقرب د میاشتې په ۲۳ مه نېټه یوه اعلامیه خپره کړه او ویې ویل: «دغه ناڅاپه راوتل په افغانستان کې د سرپناه او بنسټیزو خدمتونو په ګډون په کمزورو سرچینو باندې ډېر فشار راوړی دی.

په دې اړه د یونیما مرستیال ډانیل اندریس په یوه ویډیو کې ویلي، نن په تورخم کې له پاکستان سره په پوله کې یم او ګورم چې زرګونه افغانان له پاکستانه راستانه شوي دي.

هغه زیاته کړه: "ډیری یې په بد وضعیت کې دي. دوی دلته د راتلو لپاره څو ورځې انتظار باسي. ما دلته له ډیرو راستنیدونکو سره خبرې کړې دي او ډیری یې په افغانستان کې کور نه لري. لکه څنګه چې ژمی را نږدې کیږي، خلک په خپل سر چت ته اړتیا لري.

هغه ټینګار وکړ چې یوه له ننګونو څخه دا ده چې مرستندویه موسسو ټولې هغه خیمې، کمپلې او مرستې چې په افغانستان کې یې په هرات کې د زلزلې د مرګ ژوبلې په غبرګون کې درلودې کارولې دي او اوس له پاکستان څخه د راستنیدونکو کډوالو د سمبالولو له لویې ننګونې سره مخ دي.

اندریس یادونه وکړه چې دا خورا مهمه ده چې "موږ لومړی د بیړني حل لارې چارې ولټوو او راستنیدونکو ته نغدي مرستې، خواړه او اوبه چمتو کړو."

اوچا زیاته کړه، له پاکستان څخه افغانستان ته د راغلو مهاجرینو او پناه غوښتونکو د سمبالولو لپاره اضافي او سمدستي مالي ملاتړ ته اړتیا ده.

دا په داسې حال کې ده، چې دغه دفتر تر دې مخکې هم د هرات له زلزله ځپلو سره د مرستې لپاره د ۴۰۰ میلیونو ډالرو غوښتنه کړې ده.

جمهورخبري آژانس