د تاجکستان ولسمشرامام رحمان وايي، اړتیا ده د برېښنا د لوړ ولتاژ لرونکې کاسا زر پروژې چارې بېرته پیل شي.
نوموړي دغه څرګندونې په دوبۍ کې د ملګروملتونو د اقلیم د بدلون د ۲۸ م کنفرانس په څنډه کې د نړیوال بانک له مشراجی بنګا سره په کتنه کې کړې دي.
ولسمشر رحمان ټینګار وکړ چې د دغې سترې پروژې چې د افغانستان له لارې د مرکزي آسیا د انرژۍ مارکیټ له جنوبي آسیا سره نښلوي، کار یې باید له سره پیل شي.
د راپورله مخې، د دغې پروژې په عملي کیدو سره به له قرغزستان او تاجکستان څخه ۱۳۰۰ مېګاواټه برېښنا افغانستان او پاکستان ته لېږدول کېږي.
د آسیا پراختیایي بانک ترڅنګ نړیوال بانک چې په افغانستان کې د سترو پروژو له مهمو تمویلوونکو ګڼل کېږي، د تېرکال په دوبي کې اعلان وکړ چې افغانستان او پاکستان ته د کاسا ۱۰۰۰ په نوم د برېښنا غځولو د پروژې له تمویل څخه لاس اخلي.
جمهورخبري آژانس
