د طالبانو سیاسي مرستیال مولوي عبدالکبیر په افغانستان کې د ملګرو ملتونو د سیاسي نمایندګۍ د دفتر له مشرې مېرمن روزا اوتونبایوا سره کتنه کې ویلي، دغې ډلې د رسمیت پېژندنې لپاره ټول شرایط پوره کړي دي.
طالبانو نن د سلواغې ۲۱ مه په یوه بیان کې وویل چې نړیواله ټولنه د زیربنایي پروژو له تطبیق سره لېوالتیا لري او اړتیا ده چې د افغانانو لپاره پراختیايي کارونه وشي.
هغه وويل: "سره له دې چې په نړۍ کې ګڼې ننګونې او مهمې ستونزې شته، نړۍ افغانستان نه دى هېر کړى او غواړي چې په بېلابېلو برخو کې ورسره مرستې وکړي."
د هغه په وينا، د دوحې راتلونکې غونډه د افغانستان او افغانانو لپاره د بشري مرستو د جلب او ثبات او پرمختګ لپاره يو ښه فرصت دى.
هغه هیله څرګنده کړه چې د طالبانو د امارت د استازو په ګډون دغه غونډه به د افغانستان ریښتینی انځور په ډاګه کړي.
مېرمن اونتبایوا زیاته کړه چې په دې غونډه کې به د اسلامي امارت له استازو سره د هېوادونو په دوه اړخیزو او څو اړخیزو غونډو کې د نظریاتو د تبادلې زمینه برابره شي.
د دې ډلې سیاسي مرستیال مولوي عبدالکبیر وویل چې افغانستان د ملګرو ملتونو فعال غړی پاتې شوی او غواړي چې د دغه سازمان فعال غړی شي. هغه زیاته کړه، د طالبانو امارت له نړۍ سره د متقابل احترام په رڼا کې مثبت تعامل غواړي او یوناما په دې برخه کې مهم رول لوبولی شي.
هغه وویل چې اسلامي امارت د تسلیمیدو لپاره ټول شرایط پوره کړي او باید په رسمیت وپیژندل شي او د افغانستان دایمي څوکۍ دې اسلامي امارت ته وسپارل شي.
طالبانو د طالب ډلې پر چارواکو د نړیوالې ټولنې لخوا لګول شوي بندیزونه غیر عادلانه وبلل او زیاته یې کړه چې دغو بندیزونو له نړۍ سره د تعامل، مذاکراتو او سیاسي تفاهم مخه نیولې ده.
د طالبانو د ډلې لخوا د پيژندلو د شرايطو د پوره کولو دغه ادعا په داسې حال کې مطرح کيږي چې په افغانستان کښې د دغې ډلې د واکمنۍ له امله ښځې له کار او تعليم څخه بې برخې دي او دغې ډلې تراوسه يو ټول شموله حکومت نه دى جوړ کړى.
جمهورخبري آژانس
