په داسې حال کې چې د افغانستان په اړه د دوحې غونډه په نږدې کېدو ده، په کابل کې د امریکا پخوانی سفیر راین کراکر وايي چې طالبان د دې وړ نه دي چې په رسمیت وپېژندل شي.
ښاغلي کراکر تېره شپه له امریکا غږ سره په مرکه کې ټینګار وکړ چې طالبان د پخوا په پرتله له فکري او سیاسي پلوه نه دي بدل شوي او د دې وړ نه دي چې د ملګرو ملتونو او نړیوالې ټولنې له خوا وپېژندل شي.
هغه د افغانستان په اړه د دوحې ناستې ترسره کېدو ته په اشارې سره وویل، ملګري ملتونه د دې غونډې د کوربه په توګه باید دا روښانه کړي چې د طالبانو رژیم باید د یوه مشروع حکومت په توګه ونه منل شي.
کراکر زیاته کړه، د بایډن حکومت د طالبانو تر واکمنۍ لاندې افغانستان هېر کړی او هغه څه ته یې پام نه دی کړی چې په دغه هېواد کې پلي شوي، په تېره بیا د افغان ښځو او نجونو د کار او زده کړو د بندولو په برخه کې.
د هغه په وينا، طالبانو له القاعدې سره خپلې اړيکې ټينګې کړې او د افغانستان او نړۍ د خلکو لپاره يو جدي ګواښ بلل شوى دى.
په همدې حال کې د دوحې غونډه د روانې میلادي میاشتې په ۱۸مه او ۱۹مه د ملګرو ملتونو په کوربه توب د افغانستان په مسله کې د ښکېلو هېوادونو د ځانګړو استازو په ګډون جوړېږي.
جمهورخبري آژانس
