په هرات ولایت کې د طالبانو چارواکو د پاشدان بند ته د موټر د لوېدو له امله د پنځو ښځو او یو ماشوم په ګډون د یوې کورنۍ د شپږو غړو د مړینې خبر ورکړ.
په پېښه کې دوه نور مسافر په معجزانه توګه ژوندي پاتې شول.
د جمهور اژانس د راپور له مخې، په هرات کې د طالبانو د والي ویاند محمد یوسف سعیدي د شنبې په ورځ، د می په ۳مه، رسنیو ته وویل چې دا پیښه هغه وخت رامنځته شوه کله چې یو موټر له موټرسایکل سره د ټکر وروسته له خپلې لارې ووت او د پاشدان بند اوبو ته ولوېد.
سعیدي باختر خبري اژانس ته وویل: "د راپور له ترلاسه کولو وروسته سمدلاسه د ژغورنې ځواکونه د پیښې ځای ته واستول شول او وتوانیدل چې دوه مسافر له اوبو څخه ژوندي راوباسي."
هغه زیاته کړه چې د پیښې په قربانیانو کې پنځه ښځې او یو ماشوم شامل دي، او دوه ژوندي پاتې شوي کسان تر درملنې لاندې دي. دا پېښه په داسې حال کې رامنځته شوه چې د افغانستان په بېلابېلو برخو کې ورته پېښو پخوا هم ګڼ شمېر قربانیان له ځان سره وړي دي.
طالب چارواکو تر اوسه د پېښې د دقیق لامل یا د پېښې په ځای کې د سړک د حالت په اړه نور جزئیات نه دي ورکړي.
په افغانستان کې د سړکونو د خرابوالي، د ترافیکي قوانینو نه مراعتولو او د موټرو د خراب حالت له امله ترافیکي پیښې عامې شوې دي.
جمهورخبري آژانس
