د طالبانو د اقتصادي چارو مرستیال د تاتارستان جمهوریت ته خپل څلور ورځنی سفر له لاسته راوړنو ډک وباله.
د جمهور اژانس د راپور له مخې، د طالبانو د اقتصادي مرستیال مطبوعاتي دفتر تېره شپه (د مازدیګر ۲۷مه) ناوخته په یوه اعلامیه کې وویل چې د دې ډلې د اقتصادي مرستیال ملا عبدالغني برادر د تاتارستان جمهوریت ته له څلور ورځني رسمي سفر وروسته کابل ته راستون شوی دی.
ملا برادر وویل چې د دې سفر په جریان کې یې د تاتارستان جمهوریت او د موردویا جمهوریت له ولسمشرانو سره د سیاسي، اقتصادي او سوداګریزو مسلو په اړه ګټورې لیدنې درلودې.
طالبانو ویلي چې د دې سفر په جریان کې یې د روسیې فدراسیون له دوو مرستیال صدراعظمانو سره هم ولیدل او د کابل او مسکو ترمنځ د دوه اړخیزې سوداګرۍ د پراختیا، په افغانستان کې د روسي پانګوالو له خوا د پانګونې او د دواړو هېوادونو ترمنځ د ګډې اقتصادي همکارۍ په اړه یې هراړخیز بحثونه وکړل.
هغه وويل چې د دې سفر په ترڅ کې د افغانستان-روسیې سوداګریز فورم هم پرانیستل شو او د ترانسپورت او ترانزیت، دوه اړخیزې سوداګرۍ او د دواړو هېوادونو د خصوصي سکتورونو ترمنځ د ګډې همکارۍ په برخو کې پنځه مهم تفاهم لیکونه لاسلیک شول.
ملا برادر دا سفر له لاسته راوړنو ډک وباله.
جمهورخبري آژانس
