د طالبانو یو ویاند وايي چې ډله یې له ایراني چارواکو سره په تماس کې ده ترڅو هلته د میشتو افغان کډوالو امنیت ډاډمن کړي.

د جمهور خبري اژانس د راپور له مخې، د طالبانو ویاند ذبیح الله مجاهد د یکشنبې په شپه (د غبرګولي ۲۵ مه) وویل چې موږ هیله لرو چې د خدای په رضا به کډوالو ته زیان ونه رسیږي او وضعیت به د کنټرول وړ وي. موږ لا هم له ټولو چارواکو او ادارو سره په تماس کې یو ترڅو که خدای مه کړه کومه ستونزه رامنځته شي، نو د حل لارې ولټوو.

طالبانو ویلي چې که اړتیا وي، د افغان کډوالو د زیان د مخنیوي لپاره حل لارې هم په پام کې نیول شوي دي.

د کډوالو او راستنیدونکو چارو وزارت هم په ایران کې میشتو افغانانو څخه غوښتي چې حساسو پوځي ځایونو ته له تګ او په سیاسي غونډو او ګوندونو فعالیتونو کې له ګډون څخه ډډه وکړي.

جمهورخبري آژانس