نړیواله ټولنه د همکارۍ شعارونه ورکوي، خو زموږ د مشرانو د محاکمې ګواښونه کوي

د طالبانو د لوړو زده کړو وزارت مشر د جاپان له سفیر سره په خپله لیدنه کې وویل چې نړیواله ټولنه له یوې خوا د افغانستان لپاره د همکارۍ او ملاتړ شعارونه ورکوي او له بلې خوا د طالبانو د امارت د مشرانو د محاکمې ګواښونه کوي.

د جمهور خبري آژانس د خبر له مخې د طالبانو د لوړو زده کړو وزارت تېره شپه ناوخته (د چنګاښ ۲۲ مه) په یوه اعلامیه کې وویل چې د وزارت سرپرست مولوي ندا محمد ندیم په کابل کې د جاپان له سفیر تاکیوشي کورومایا سره لیدلي دي.

ندیم په دې غونډه کې وویل چې له یوې خوا نړیواله ټولنه د افغانستان لپاره د همکارۍ او ملاتړ شعارونه ورکوي او له بلې خوا د طالبانو د امارت د مشرانو د محاکمې ګواښونه کوي.

طالبانو وویل چې د دین، اسلامي قانون او د خلکو غوښتنو ته غاړه ایښودل د نظام لومړیتوب دی.

هغه ادعا وکړه چې د لوړو زده کړو وزارت د دیني او معاصرو زده کړو او معیاري څیړنو ته ژمن دی چې د دیني او ملي ارزښتونو سره سم وي او د افغان ټولنې اړتیاوې پوره کړي.

د جاپان سفیر په افغانستان کې د خپل هیواد د مرستو او همکارۍ په اړه معلومات ورکړل او ژمنه یې وکړه چې مرستې به دوام ورکړي.

جمهورخبري آژآنس