په نیمروز کې د طالبانو والي د کډوالۍ نړیوال سازمان (IOM) له چارواکو سره وکتل او د کډوالو په ټاکل شوي دایمي استوګنځای کې یې د څښاک اوبو، روغتیايي مرکز او ښوونځي د برابرولو غوښتنه وکړه.

د جمهور آژانس د خبر له مخې نیمروز والي د رسنیو دفتر نن دوشنبې  (د چنګاښ ۳۰ مه) په یوه بیان کې وویل چې د نیمروز والي محمد قاسم خالد د نیمروز په جنوب لویدیځ زون کې د IOM له چارواکو سره ولیدل.

خالد د راستنیدونکو کډوالو اړتیاوې او لومړیتوبونه د سازمان له چارواکو سره شریک کړل او له هغوی یې وغوښتل چې د کډوالو لپاره خپل د مرستې پروګرامونه زیات کړي.

د نیمروز والي وویل: «کډوالو ته د مرستې په برخه کې هیڅ محدودیت نشته، او ورکړل شوې مرستې باید شفافې وي، او هغه مرستې چې دوی ته ځانګړې شوې وي باید دوی ته وویشل شي.»

هغه دا هم زیاته کړه: "د غور په سیمه کې کډوال د څښاک اوبو، روغتیايي مرکز او په ټاکل شوي دایمي استوګنځای کې ښوونځي ته اړتیا لري، او دې توکو ته باید لومړیتوب ورکړل شي."

د کډوالۍ نړیوال سازمان (IOM) چارواکو په دې برخو کې د بشپړې همکارۍ ډاډ ورکړ.

جمهورخبري آژانس