په ملګرو ملتونو کې د افغانستان استازی وايي، د طالبانو له خوا د پخوانیو حکومتي سرتیرو هدفي وژنه بې له کوم ځنډه دوام لري.
د جمهور اژانس د راپور له مخې، په ملګرو ملتونو کې د افغانستان استازي ناصر احمد فایق نن یکشنبه (د زمري ۵ مه) په خپله اېکس پاڼه لیکلي، څنګه څوک کولی شي د طالبانو ډلې د امنیت، سولې او عمومي بخښنې په ادعا باور وکړي، پداسې حال کې چې خپل سري نیونې، غیر انساني شکنجه او د پخوانیو سرتیرو هدفي وژنې بې له کوم ځنډه دوام لري.
هغه د بې وسلې او غیر جنګي کسانو وژنه د اسلامي تعلیماتو، د نړیوال بشري قانون د قوانینو او انساني وجدان سره په ښکاره تضاد کې ګڼله.
د فایق په وینا، د طالبانو ډله نشي کولی په ظلم، بې عدالتۍ، د بې ګناه خلکو وژنه، د ساینس او کلتور سره دښمني، د ښځو او نجونو د خپلو اساسي حقونو څخه محرومول، او د ترهګرۍ او وحشت رامینځته کول سره حکومت وکړي.
دا څرګندونې په داسې حال کې کیږي چې د برتانوي ورځپاڼې ډیلي ټیلیګراف لخوا یوه څېړنه ښیي چې طالبان په مختلفو ولایتونو کې پخواني امنیتي ځواکونه په ګوته کوي او وژني.
جمهورخبري آژانس
