په ننګرهار ولایت کې سیمه ییزو طالبانو د یوې ورځې تړل کېدو وروسته د تورخم سرحدي لاره د بیا پرانیستلو اعلان وکړ.

د جمهور آژانس د خبر له مخې، د ننګرهار ولایت لپاره د طالبانو د والي د رسنیو دفتر نن سې شنبې (د تلې اوله) په یوه بیان کې وویل چې د تورخم سرحدي لاره د یوې ورځې تړل کېدو وروسته بیا پرانیستل شوې ده.

په بیان کې زیاته شوې ده: "دا لاره نن د مسافرو د تګ راتګ او د توکو د لیږد لپاره پرانیستل شوې ده."

په ننګرهار کې سیمه ییزو طالبانو پرون اعلان وکړ چې د تورخم سرحدي لاره د انټرنیټ او تخنیکي ستونزو له امله د پاکستان لخوا تړل شوې ده.

دا لاره څو ځله مخکې د طالبانو او پاکستان ترمنځ د پوځي نښتو او سیاسي کړکیچونو له امله تړل شوې ده.

جمهورخبري آژانس