د طالبانو د عدلیې وزارت پلان لري چې د جنرال سید حسین انوري جسد د دارالامان د اسکارټ غونډۍ څخه بل ځای ته انتقال کړي.
د جمهور آژانس د خبر له مخې سرچینو نن شنبې (د تلې ۵ مه) رسنیو ته وویل چې د عدلیې وزارت او د طالبانو استخباراتي جنګیالیو د حرکت اسلامي ګوند د پوځي څانګې د پخواني مشر میجر جنرال سید حسین انوري د مقبرې په بیارغونه کې مداخله کړې او د ټولو ساختماني کارونو د سمدستي بندولو امر یې کړی دی.
د سرچینو په وینا، د طالبانو د عدلیې وزارت پلان لري چې د میجر جنرال سید حسین انوري جسد د کابل د دارالامان سیمې د اسکارټ غونډۍ څخه بل ځای ته انتقال کړي.
سرچینو وویل چې د طالبانو د عدلیې وزیر د مقبرې د بیارغونې پروژې له چارواکو سره په یوه غونډه کې ټینګار وکړ چې کار په بشپړه توګه ودرول شوی او تر بلې خبرتیا پورې به په دې ځای کې هیڅ ډول فعالیت ترسره نشي.
سید حسین انوري د افغان جهاد یو مشهور پوځي او سیاسي مشر و. د شوروي اتحاد پر وړاندې د جهاد د رهبرۍ سربیره، هغه په تیرو حکومتونو کې د کرنې، اوبو لګولو او مالدارۍ وزیر، د ولسمشر پوځي سلاکار، د هرات ولایت والي او د افغانستان په پارلمان کې د خلکو د استازي په توګه هم دنده ترسره کړې ده.
هغه د ۲۰۱۶ کال د جولای په ۶مه په هند کې د سرطان له امله مړ شو. د هغه جسد کابل ته ولیږدول شو او په سکارټ غونډۍ کې خاورو ته وسپارل شو.
جمهورخبري آژانس
